Mujh Ko Sambhal, Khud Bhi Sambhal

Mujh Ko Sambhal, Khud Bhi Sambhal, Main Nashe Mein Hun.  

Aye Jaan E Ghazal Sath Mein Chal, Main Nashe Mein Hun.

Aur Akbar Bhi Main, Saleem Bhi Main, Shah Jahan Bhi Main,  

Lakhon Bana Do Taj Mahal, Main Nashe Mein Hun

‏دیواروں سے مل کر رونا اچھا لگتا ہے

‏دیواروں سے مل کر رونا اچھا لگتا ہے 

ہم بھی پاگل ہو جائیں گے ایسا لگتا ہے 

کتنے دنوں کے پیاسے ہوں گے یارو سوچو تو 

شبنم کا قطرہ بھی جن کو دریا لگتا ہے 

آنکھوں کو بھی لےڈوبا یہ دل کا پاگل پن 

آتے جاتے جو ملتا ہے ، تم سا لگتا ہے 

اس بستی میں کون ہمارےآنسو پونچھے گا 

جو ملتا ہے اس کا دامن بھیگا لگتا ہے 

دنیا بھر کی یادیں ہم سے ملنے آتی ہیں 

شام ڈھلے اس سونے گھر میں میلہ لگتا ہے 

کس کو پتھر ماروں قیصرؔ کون پرایا ہے 

شیش محل میں اک اک چہرا اپنا لگتا ہے

 قیصر الجعفری

کچھ تو مجبوریاں رہیں ہوں گی

 کوئی کانٹا چبھا نہیں ہوتا

دل اگر پھول سا نہیں ہوتا

کچھ تو مجبوریاں رہیں ہوں گی

یوں کوئی بے وفا نہیں ہوتا

گفتگو ان سے روز ہوتی ہے

مدتوں سامنا نہیں ہوتا

جی بہت چاہتا ہے سچ بولیں

کیا کریں حوصلہ نہیں ہوتا

رات کا انتظار کون کرے

آج کل دن میں کیا نہیں ہوتا

میں غزل ہوں مجھے جب آپ سنا کرتے ہیں

 میں غزل ہوں مجھے جب آپ سنا کرتے ہیں

چند لمحے مرا غم بانٹ لیا کرتے ہیں

جب وفا کرتے ہیں ہم صرف وفا کرتے ہیں

اور جفا کرتے ہیں جب صرف جفا کرتے ہیں

لوگ چاہت کی کتابوں میں چھپا کر چہرے

صرف جسموں کی ہی تحریر پڑھا کرتے ہیں

لوگ نفرت کی فضاؤں میں بھی جی لیتے ہیں

ہم محبت کی ہوا سے بھی ڈرا کرتے ہیں

اپنے بچوں کے لئے لاکھ غریبی ہو مگر

ماں کے پلو میں کئی سکے ملا کرتے ہیں

جو کبھی خوش نہ ہوئے دیکھ کے شہرت میری

میرے اپنے ہیں مجھے پیار کیا کرتے ہیں

جن کے جذبات ہوں نقصان نفع کی زد میں

ان کے دل میں کئی بازار سجا کرتے ہیں

فکر و احساس پہ پردہ ہے حیاؔ کا ورنہ

ہم غلط بات نہ سنتے نہ کہا کرتے ہیں

تیری ہر بات محبت میں گوارا کر کے

تیری ہر بات محبت میں گوارا کر کے

دل کے بازار میں بیٹھے ہیں خسارہ کر کے

آتے جاتے ہیں کئی رنگ مرے چہرے پر

لوگ لیتے ہیں مزا ذکر تمہارا کر کے

ایک چنگاری نظر آئی تھی بستی میں اسے

وہ الگ ہٹ گیا آندھی کو اشارہ کر کے

آسمانوں کی طرف پھینک دیا ہے میں نے

چند مٹی کے چراغوں کو ستارہ کر کے

میں وہ دریا ہوں کہ ہر بوند بھنور ہے جس کی

تم نے اچھا ہی کیا مجھ سے کنارہ کر کے

منتظر ہوں کہ ستاروں کی ذرا آنکھ لگے

چاند کو چھت پہ بلا لوں گا اشارہ کر کے

وہ بلائیں تو کیا تماشا ہو

وہ بلائیں تو کیا تماشا ہو

ہم نہ جائیں تو کیا تماشا ہو

یہ کناروں سے کھیلنے والے

ڈوب جائیں تو کیا تماشا ہو

بندہ پرور جو ہم پہ گزری ہے

ہم بتائیں تو کیا تماشا ہو

آج ہم بھی تری وفاؤں پر

مسکرائیں تو کیا تماشا ہو

تیری صورت جو اتفاق سے ہم

بھول جائیں تو کیا تماشا ہو

وقت کی چند ساعتیں ساغرؔ

لوٹ آئیں تو کیا تماشا ہو

آپ کا اعتبار کون کرے

آپ کا اعتبار کون کرے

روز کا انتظار کون کرے

ذکر مہر و وفا تو ہم کرتے

پر تمہیں شرمسار کون کرے

ہو جو اس چشم مست سے بے خود

پھر اسے ہوشیار کون کرے

تم تو ہو جان اک زمانے کی

جان تم پر نثار کون کرے

آفت روزگار جب تم ہو

شکوۂ روزگار کون کرے

اپنی تسبیح رہنے دے زاہد

دانہ دانہ شمار کون کرے

ہجر میں زہر کھا کے مر جاؤں

موت کا انتظار کون کرے

آنکھ ہے ترک زلف ہے صیاد

دیکھیں دل کا شکار کون کرے

وعدہ کرتے نہیں یہ کہتے ہیں

تجھ کو امیدوار کون کرے

داغؔ کی شکل دیکھ کر بولے

ایسی صورت کو پیار کون کرے

عمر گزرے گی امتحان میں کیا

عمر گزرے گی امتحان میں کیا

داغ ہی دیں گے مجھ کو دان میں کیا

میری ہر بات بے اثر ہی رہی

نقص ہے کچھ مرے بیان میں کیا

مجھ کو تو کوئی ٹوکتا بھی نہیں

یہی ہوتا ہے خاندان میں کیا

اپنی محرومیاں چھپاتے ہیں

ہم غریبوں کی آن بان میں کیا

خود کو جانا جدا زمانے سے

آ گیا تھا مرے گمان میں کیا

شام ہی سے دکان دید ہے بند

نہیں نقصان تک دکان میں کیا

اے مرے صبح و شام دل کی شفق

تو نہاتی ہے اب بھی بان میں کیا

بولتے کیوں نہیں مرے حق میں

آبلے پڑ گئے زبان میں کیا

خامشی کہہ رہی ہے کان میں کیا

آ رہا ہے مرے گمان میں کیا

دل کہ آتے ہیں جس کو دھیان بہت

خود بھی آتا ہے اپنے دھیان میں کیا

وہ ملے تو یہ پوچھنا ہے مجھے

اب بھی ہوں میں تری امان میں کیا

یوں جو تکتا ہے آسمان کو تو

کوئی رہتا ہے آسمان میں کیا

ہے نسیم بہار گرد آلود

خاک اڑتی ہے اس مکان میں کیا

یہ مجھے چین کیوں نہیں پڑتا

ایک ہی شخص تھا جہان میں کیا

آنکھوں میں رہا دل میں اتر کر نہیں دیکھا

آنکھوں میں رہا دل میں اتر کر نہیں دیکھا

کشتی کے مسافر نے سمندر نہیں دیکھا

بے وقت اگر جاؤں گا سب چونک پڑیں گے

اک عمر ہوئی دن میں کبھی گھر نہیں دیکھا

جس دن سے چلا ہوں مری منزل پہ نظر ہے

آنکھوں نے کبھی میل کا پتھر نہیں دیکھا

یہ پھول مجھے کوئی وراثت میں ملے ہیں

تم نے مرا کانٹوں بھرا بستر نہیں دیکھا

یاروں کی محبت کا یقیں کر لیا میں نے

پھولوں میں چھپایا ہوا خنجر نہیں دیکھا

محبوب کا گھر ہو کہ بزرگوں کی زمینیں

جو چھوڑ دیا پھر اسے مڑ کر نہیں دیکھا

خط ایسا لکھا ہے کہ نگینے سے جڑے ہیں

وہ ہاتھ کہ جس نے کوئی زیور نہیں دیکھا

پتھر مجھے کہتا ہے مرا چاہنے والا

میں موم ہوں اس نے مجھے چھو کر نہیں دیکھا

محبتوں میں دکھاوے کی دوستی نہ ملا

محبتوں میں دکھاوے کی دوستی نہ ملا

اگر گلے نہیں ملتا تو ہاتھ بھی نہ ملا

گھروں پہ نام تھے ناموں کے ساتھ عہدے تھے

بہت تلاش کیا کوئی آدمی نہ ملا

تمام رشتوں کو میں گھر پہ چھوڑ آیا تھا

پھر اس کے بعد مجھے کوئی اجنبی نہ ملا

خدا کی اتنی بڑی کائنات میں میں نے

بس ایک شخص کو مانگا مجھے وہی نہ ملا

بہت عجیب ہے یہ قربتوں کی دوری بھی

وہ میرے ساتھ رہا اور مجھے کبھی نہ ملا

سر سے پا تک وہ گلابوں کا شجر لگتا ہے

سر سے پا تک وہ گلابوں کا شجر لگتا ہے

با وضو ہو کے بھی چھوتے ہوئے ڈر لگتا ہے

میں ترے ساتھ ستاروں سے گزر سکتا ہوں

کتنا آسان محبت کا سفر لگتا ہے

مجھ میں رہتا ہے کوئی دشمن جانی میرا

خود سے تنہائی میں ملتے ہوئے ڈر لگتا ہے

بت بھی رکھے ہیں نمازیں بھی ادا ہوتی ہیں

دل مرا دل نہیں اللہ کا گھر لگتا ہے

زندگی تو نے مجھے قبر سے کم دی ہے زمیں

پاؤں پھیلاؤں تو دیوار میں سر لگتا ہے

پرکھنا مت پرکھنے میں کوئی اپنا نہیں رہتا

پرکھنا مت پرکھنے میں کوئی اپنا نہیں رہتا

کسی بھی آئنے میں دیر تک چہرہ نہیں رہتا

بڑے لوگوں سے ملنے میں ہمیشہ فاصلہ رکھنا

جہاں دریا سمندر سے ملا دریا نہیں رہتا

ہزاروں شیر میرے سو گئے کاغذ کی قبروں میں

عجب ماں ہوں کوئی بچہ مرا زندہ نہیں رہتا

محبت ایک خوشبو ہے ہمیشہ ساتھ چلتی ہے

کوئی انسان تنہائی میں بھی تنہا نہیں رہتا

لوگ ہر موڑ پہ رک رک کے سنبھلتے کیوں ہیں

لوگ ہر موڑ پہ رک رک کے سنبھلتے کیوں ہیں

اتنا ڈرتے ہیں تو پھر گھر سے نکلتے کیوں ہیں

موڑ ہوتا ہے جوانی کا سنبھلنے کے لیے

اور سب لوگ یہیں آ کے پھسلتے کیوں ہیں

مے کدہ ظرف کے معیار کا پیمانہ ہے

خالی شیشوں کی طرح لوگ اچھلتے کیوں ہیں

نیند سے میرا تعلق ہی نہیں برسوں سے

خواب آ آ کے مری چھت پہ ٹہلتے کیوں ہیں

میں نہ جگنو ہوں دیا ہوں نہ کوئی تارا ہوں

روشنی والے مرے نام سے جلتے کیوں ہیں

میرے حجرے میں نہیں اور کہیں پر رکھ دو

میرے حجرے میں نہیں اور کہیں پر رکھ دو

آسماں لائے ہو لے آؤ زمیں پر رکھ دو

اب کہاں ڈھونڈھنے جاؤ گے ہمارے قاتل

آپ تو قتل کا الزام ہمیں پر رکھ دو

میں نے جس تاک پہ کچھ ٹوٹے دیے رکھے ہیں

چاند تاروں کو بھی لے جا کے وہیں پر رکھ دو

رنگ اس موسم میں بھرنا چاہئے

رنگ اس موسم میں بھرنا چاہئے

سوچتی ہوں پیار کرنا چاہئے

زندگی کو زندگی کے واسطے

روز جینا روز مرنا چاہئے

دوستی سے تجربہ یہ ہو گیا

دشمنوں سے پیار کرنا چاہئے

پیار کا اقرار دل میں ہو مگر

کوئی پوچھے تو مکرنا چاہئے

انجم رہبر

ہونٹوں پہ محبت کے فسانے نہیں آتے

ہونٹوں پہ محبت کے فسانے نہیں آتے

ساحل پہ سمندر کے خزانے نہیں آتے

دل اجڑی ہوئی ایک سرائے کی طرح ہے

اب لوگ یہاں رات جگانے نہیں آتے

پلکیں بھی چمک اٹھتی ہیں سوتے میں ہماری

آنکھوں کو ابھی خواب چھپانے نہیں آتے

یارو نئے موسم نے یہ احسان کیے ہیں

اب یاد مجھے درد پرانے نہیں آتے

اڑنے دو پرندوں کو ابھی شوخ ہوا میں

پھر لوٹ کے بچپن کے زمانے نہیں آتے

اس شہر کے بادل تری زلفوں کی طرح ہیں

یہ آگ لگاتے ہیں بجھانے نہیں آتے

احباب بھی غیروں کی ادا سیکھ گئے ہیں

آتے ہیں مگر دل کو دکھانے نہیں آتے

یوں ہی بے سبب نہ پھرا کرو کوئی شام گھر میں رہا کرو

یوں ہی بے سبب نہ پھرا کرو کوئی شام گھر میں رہا کرو

وہ غزل کی سچی کتاب ہے اسے چپکے چپکے پڑھا کرو

کوئی ہاتھ بھی نہ ملائے گا جو گلے ملو گے تپاک سے

یہ نئے مزاج کا شہر ہے ذرا فاصلہ سے ملا کرو

ابھی راہ میں کئی موڑ ہیں کوئی آئے گا کوئی جائے گا

تمہیں جس نے دل سے بھلا دیا اسے بھولنے کی دعا کرو

مجھے اشتہار سی لگتی ہیں یہ محبتوں کی کہانیاں

جو کہا نہیں وہ سنا کرو جو سنا نہیں وہ کہا کرو

کبھی حسن پردہ نشیں بھی ہو ذرا عاشقانہ لباس میں

جو میں بن سنور کے کہیں چلوں مرے ساتھ تم بھی چلا کرو

نہیں بے حجاب وہ چاند سا کہ نظر کا کوئی اثر نہ ہو

اسے اتنی گرمیٔ شوق سے بڑی دیر تک نہ تکا کرو

یہ خزاں کی زرد سی شال میں جو اداس پیڑ کے پاس ہے

یہ تمہارے گھر کی بہار ہے اسے آنسوؤں سے ہرا کرو

نیا اک رشتہ پیدا کیوں کریں ہم

نیا اک رشتہ پیدا کیوں کریں ہم

بچھڑنا ہے تو جھگڑا کیوں کریں ہم

خموشی سے ادا ہو رسم دوری

کوئی ہنگامہ برپا کیوں کریں ہم

یہ کافی ہے کہ ہم دشمن نہیں ہیں

وفا داری کا دعویٰ کیوں کریں ہم

وفا اخلاص قربانی محبت

اب ان لفظوں کا پیچھا کیوں کریں ہم

سنا دیں عصمت مریم کا قصہ

پر اب اس باب کو وا کیوں کریں ہم

زلیخائے عزیزاں بات یہ ہے

بھلا گھاٹے کا سودا کیوں کریں ہم

ہماری ہی تمنا کیوں کرو تم

تمہاری ہی تمنا کیوں کریں ہم

کیا تھا عہد جب لمحوں میں ہم نے

تو ساری عمر ایفا کیوں کریں ہم

اٹھا کر کیوں نہ پھینکیں ساری چیزیں

فقط کمروں میں ٹہلا کیوں کریں ہم

جو اک نسل فرومایہ کو پہنچے

وہ سرمایہ اکٹھا کیوں کریں ہم

نہیں دنیا کو جب پروا ہماری

تو پھر دنیا کی پروا کیوں کریں ہم

برہنہ ہیں سر بازار تو کیا

بھلا اندھوں سے پردہ کیوں کریں ہم

ہیں باشندے اسی بستی کے ہم بھی

سو خود پر بھی بھروسا کیوں کریں ہم

چبا لیں کیوں نہ خود ہی اپنا ڈھانچہ

تمہیں راتب مہیا کیوں کریں ہم

پڑی رہنے دو انسانوں کی لاشیں

زمیں کا بوجھ ہلکا کیوں کریں ہم

یہ بستی ہے مسلمانوں کی بستی

یہاں کار مسیحا کیوں کریں ہم

تم حقیقت نہیں ہو حسرت ہو

تم حقیقت نہیں ہو حسرت ہو

جو ملے خواب میں وہ دولت ہو

میں تمہارے ہی دم سے زندہ ہوں

مر ہی جاؤں جو تم سے فرصت ہو

تم ہو خوشبو کے خواب کی خوشبو

اور اتنی ہی بے مروت ہو

تم ہو پہلو میں پر قرار نہیں

یعنی ایسا ہے جیسے فرقت ہو

تم ہو انگڑائی رنگ و نکہت کی

کیسے انگڑائی سے شکایت ہو

کس طرح چھوڑ دوں تمہیں جاناں

تم مری زندگی کی عادت ہو

کس لئے دیکھتی ہو آئینہ

تم تو خود سے بھی خوبصورت ہو

داستاں ختم ہونے والی ہے

تم مری آخری محبت ہو

ﻧﺌﮯ ﺯﻣﺎﻧﮯ ﮐﺎ ﺟﻮﻥ ﮨﻮﮞ ﻣﯿﮟ

ﮐﯿﺎ ﻟﮕﺎ ﺗﮭﺎ ؟

ﮐﮧ ﺧﻮﺩ ﮐﻮ ﻣﺠﮫ ﻣﯿﮟ

ﻧﭽﻮﮌ ﺩﻭ ﮔﮯ ؟

ﭘﮭﺮ ﮨﻢ ﺳﮯ ﭘﻮﭼﮭﻮ ﮔﮯ ﻏﻢ ﮨﻤﺎﺭﮮ

ﺟﺐ ﺩﻝ ﺑﮭﺮﮮ ﮔﺎ

ﺗﻮ ﭼﮭﻮﮌ ﺩﻭ ﮔﮯ؟

ﺑﺘﺎﺅ ﺟﺎﻧﺎﮞ ۔۔۔

ﯾﮩﯽ ﻟﮕﺎ ﺗﮭﺎ ؟

ﯾﮧ ﺑﮯ ﺿﺮﺭ ﺳﺎ ﺟﻮ ﺍﯾﮏ ﻟﮍﮐﺎ

ﻋﺎﺟﺰﯼ ﮐﺎ ﻟﺒﺎﺱ ﺍﻭﮌﮬﮯ

ﻏﻠﯿﻆ ﻟﻮﮔﻮﮞ ﻣﯿﮟ ﺟﯽ ﺭﮨﺎ ﮨﮯ

ﺑﮩﺎ ﮐﮯ ﺁﻧﺴﻮ ﻋﺘﺎﺏ ﻋﺒﺮﺕ

ﺑﮩﺖ ﺗﺴﻠﯽ ﺳﮯ ﭘﯽ ﺭﮨﺎ ﮨﮯ

ﺑﮩﺖ ﮨﯽ ﭼﭗ ﮨﮯ

ﺗﻮ ﭼُﭗ ﺭﮨﮯ ﮔﺎ ؟

ﮐﮧ ﺭﻭﺷﻨﯽ ﺑﮭﯽ ﯾﮧ ﮐﮧ ﺭﮨﯽ ﺗﮭﯽ

ﮐﯿﺎ ﺍﺏ ﺍﻧﺪﮬﯿﺮﺍ

ﮨﯽ ﮔُﭗ ﺭﮨﮯ ﮔﺎ ۔۔ ؟

ﺗﻮ ﺍﯾﺴﯽ ﺳﻮﭼﯿﮟ ﻏﻼﻡ ﺩﻝ ﺳﮯ

ﻧﮑﺎﻝ ﭘﮭﯿﻨﮑﻮ

ﺍﮔﺮ ﺍﻧﺪﮬﯿﺮﺍ ﯾﮩﺎﮞ ﭘﮧ ﺁﺋﮯ

ﺗﻮ ﺍﺱ ﭘﮧ ﻣﯿﺮﯼ

ﻭﮦ ﺷﺎﻝ ﭘﮭﯿﻨﮑﻮ ۔۔

ﻭﮦ ﺷﺎﻝ ﺟﺎﻧﺎﮞ

ﺟﻮ ﮨﻢ ﻧﮯ ﺳﻮﺭﺝ ﺳﮯ ﺗﯿﺮﯼ ﺧﺎﻃﺮ

ﺍﺩﮬﺎﺭ ﻟﯽ ﺗﮭﯽ ۔۔۔۔۔۔

ﻭﮦ ﺷﺎﻝ ﺟﺎﻧﺎﮞ

ﮐﮧ ﺟﺲ ﻣﯿﮟ ﮨﻢ ﻧﮯ ﺧﺰﺍﮞ ﭼﮭﭙﺎ ﮐﮯ

ﺗﻤﮩﺎﺭﯼ ﺧﺎﻃﺮ ،

ﺑﮩﺎﺭ ﻟﯽ ﺗﮭﯽ

ﺍﮔﺮ ﻭﮦ ﭘﮭﺮ ﺑﮭﯽ ﻧﮧ ﭘﯿﭽﮭﺎ ﭼﮭﻮﮌﮮ

ﺗﻮ ﺍﺳﮑﻮ ﮐﮩﻨﺎ

ﮐﮧ ﻣﺠﮭﮑﻮ ثاقی ﻧﮯ ﯾﮧ ﮐﮩﺎ ﮨﮯ

ﮐﮧ ﺭﻭﺷﻨﯽ ﮐﯽ ﻧﮧ ﻓﮑﺮ ﮐﺮﻧﺎ

ﮐﺴﯽ ﺳﮯ ﻣﯿﺮﺍ ﻧﮧ ﺫﮐﺮ ﮐﺮﻧﺎ

ﻣﯿﮟ ﺍﭘﻨﮯ ﺣﺼﮯ ﮐﮯ ﺳﺎﺭﮮ ﺟﮕﻨﻮ

ﺗﻤﮩﺎﺭﮮ ﻗﺪﻣﻮﮞ ﻣﯿﮟ ﮈﺍﻝ ﺩﻭﻧﮕﺎ

ﮐﮧ ﺍﺏ ﺍﻧﺪﮬﯿﺮﮮ ﻧﮯ ﺗﺠﮭﮑﻮ ﺩﯾﮑﮭﺎ

ﺗﻮ ﺍﺳﮑﯽ ﺁﻧﮑﮭﯿﮟ ﻧﮑﺎﻝ ﺩﻭﻧﮕﺎ ۔۔۔۔

ﻣﮕﺮ ﺯﻣﺎﻧﮧ ﺑﺪﻝ ﭼﮑﺎ ﮨﮯ ۔۔۔۔

ﺗﻤﺎﻡ ﭼﯿﺰﯾﮟ ﺟﻮ ﻣﻔﺖ ﻟﯽ ﺗﮭﯽ

ﺍﺏ ﺗﻢ ﺍﻧﮑﺎ ﺣﺴﺎﺏ ﻟﮑﮭﻮ

ﮐﮧ ﻣﯿﮟ ﻧﮯ ﻟﮑﮭﺎ ﺗﮭﺎ ﺍﯾﮏ ﺻﻔﺤﮧ

ﺗﻢ ﺍﺳﮑﮯ ﺑﺪﻟﮯ ﮐﺘﺎﺏ ﻟﮑﮭﻮ

ﻟﮑﮭﻮ ﮐﮧ ﮐﯿﺴﮯ ﺷﺮﺍﺏ ﭼﮭﻮﮌﯼ

ﻟﮑﮭﻮ ﮐﮧ ﮐﯿﺴﮯ ﺟﻨﺎﺏ ﭼﮭﻮﮌﯼ

ﻟﮑﮭﻮ ﮐﮧ ﮐﯿﺴﮯ ﻭﮦ ﻭﻋﺪﮮ ﺗﻮﮌﮮ

ﻟﮑﮭﻮ ﮐﮧ ﮐﯿﺴﮯ ﯾﻮﮞ ﺍﭘﻨﮯ ﭼﮭﻮﮌﮮ

ﻟﮑﮭﻮ ﮐﮧ ﮐﯿﺴﮯ ﭼﻼ ﺗﮭﺎ ثاقی

ﻟﮑﮭﻮ ﮐﮧ ﮐﯿﺴﮯ ﺟﻼ ﺗﮭﺎ ثاقی

ﻟﮑﮭﻮ ﮐﮧ ﮐﯿﺴﮯ ﻭﮦ ﭼُﭗ ﺭﮨﺎ ﺗﮭﺎ

ﻟﮑﮭﻮ ﺍﻧﺪﮬﯿﺮﺍ ﺑﮭﯽ ﮔُﭗ ﺭﮨﺎ ﺗﮭﺎ ۔۔۔

ﻣﮕﺮ ﯾﮧ ﻟﮑﮭﻨﮯ ﮐﮯ ﻭﺍﺳﻄﮯ ﺗﻮ

ﺗﻤﮩﯿﮟ ﺑﮭﯽ ﺟﻠﻨﺎ ﭘﮍﮮ ﮔﺎ ﺟﺎﻧﺎﮞ

ﺗﻤﮩﯿﮟ ﺑﮭﯽ ﻣﯿﺮﯼ ﻃﺮﺡ ﺍﮐﯿﻼ

ﺟﯽ ﮐﮯ ﻣﺮﻧﺎ ﭘﮍﮮ ﮔﺎ ﺟﺎﻧﺎﮞ

ﻣﮕﺮ ﯾﮧ ﺗﻢ ﺳﮯ

ﮐﺒﮭﯽ ﺑﮭﯽ ﻟﯿﮑﻦ

ﻧﮧ ﮨﻮ ﺳﮑﺎ ﮨﮯ

ﻧﮧ ﮨﻮ ﺳﮑﮯ ﮔﺎ

ﮐﮧ ﮐﻮﺋﯽ ﺑﮭﯽ ﺍﺏ

ﺳﭻ ﮐﺎ ﭘﯿﭽﮭﺎ

ﻧﮧ ﮐﺮ ﺭﮨﺎ ﮨﮯ

ﻧﮧ ﮐﺮ ﺳﮑﮯ ﮔﺎ

ﺗﻮ ﭼﮭﻮﮌﻭ ﺟﺎﻧﺎﮞ ﺳﻮﺍﻝ ﺳﺎﺭﮮ

ﻓﻘﻂ ﺗﻢ ﺍﭘﻨﺎ ﺟﻮﺍﺏ ﺳﻦ ﻟﻮ

ﻣﯿﺮﺍ ﺳﺎﺭﺍ ﻋﺬﺍﺏ ﺳﻦ ﻟﻮ

ﮐﮧ

ﮐﻮﻥ ﮨﻮﮞ ﻣﯿﮟ ۔۔۔۔۔۔۔ ؟

ﺍﮔﺮ ﺗﻢ ﭘﻮﭼﮭﻮ ﮔﮯ ﻣﯿﺮﺍ ﺷﺠﺮﮦ

ﺗﻮ ﻏﺰﻧﻮﯼ ﮐﺎ ﻋﻮﻥ ﮨﻮﮞ ﻣﯿﮟ

ﮐﺒﮭﯽ ﺟﻮ ﻟﭩﮑﺎ ﺗﮭﺎ ﺳﻮﻟﯽ ﭘﺮ ﻭﮦ

ﺍﻧﺎ ﺍﻟﺤﻖ ﮐﺎ ﺟﻨﻮﻥ ﮨﻮﮞ ﻣﯿﮟ

ﮐﺒﮭﯽ ﻣﯿﮟ ﺳﺐ ﮐﺎ ﺟﻮﺍﺏ ﺩﮮ ﺩﻭﮞ

ﮐﺒﮭﯽ ﺳﻮﺍﻝِ ﺑﺪﻭﻥ ﮨﻮﮞ ﻣﯿﮟ

ﮐﺒﮭﯽ ﻣﯿﮟ ﭼﯿﺨﻮﮞ ﺑﮭﮍﮎ ﺑﮭﮍﮎ ﮐﺮ

ﮐﺒﮭﯽ ﺳﺮﺍﭘﺎ ﺳﮑﻮﻥ ﮨﻮﮞ ﻣﯿﮟ

ﮐﺒﮭﯽ ﻣﯿﮟ ﺟﮭﯿﻠﻮﮞ ﺯﻣﺎﻧﮯ ﺑﮭﺮ ﮐﻮ

ﮐﺒﮭﯽ ﺷﮑﺴﺘﮧ ﺳﺘﻮﻥ ﮨﻮﮞ ﻣﯿﮟ

ﮐﺒﮭﯽ ﻣﯿﮟ ﭘﮍﮪ ﻟﻮﮞ ﻧﻤﺎﺯﯾﮟ ﺳﺎﺭﯼ

ﮐﺒﮭﯽ ﻓﺮﺍﺋﺾ ﮐﺎ ﺧﻮﻥ ﮨﻮﮞ ﻣﯿﮟ ۔۔۔

ﺍﮔﺮ ﺻﻔﺎﺋﯽ ﻧﮩﯽ ﯾﮧ ﮐﺎﻓﯽ۔۔۔۔۔

ﺍﺑﮭﯽ ﺑﮭﯽ ﺷﮏ ﮨﮯ ﮐﮧ ﮐﻮﻥ ﮨﻮﮞ ﻣﯿﮟ

ﺗﻮ ﻓﺎﺭﮨﮧ ﺑﮭﯽ ﯾﮧ ﮐﮧ ﺭﮨﯽ ﮨﮯ

ﻧﺌﮯ ﺯﻣﺎﻧﮯ ﮐﺎ ﺟﻮﻥ ﮨﻮﮞ ﻣﯿﮟ ۔۔۔

ﺳﻦ ﻟﯿﺎ ﻧﺎ ﮐﮧ ﮐﻮﻥ ﮨﻮﮞ ﻣﯿﮟ ؟

ﺟﻮﻥ ﺗﮭﺎ ﻭﮦ

ﺟﻮﻥ ﮨﻮﮞ ميں۔۔

تو کہانی ہی کے پردے

تو کہانی ہی کے پردے میں بھلی لگتی ہے

زندگی تیری حقیقت نہیں دیکھی جاتی

اگر یہ کہہ دو بغیر میرے نہیں گزارہ تو میں تمہارا

اگر یہ کہہ دو بغیر میرے نہیں گزارہ تو میں تمہارا

یا اس پہ مبنی کوئی تأثر کوئی اشارا تو میں تمہارا

غرور پرور انا کا مالک کچھ اس طرح کے ہیں نام میرے

مگر قسم سے جو تم نے اک نام بھی پکارا تو میں تمہارا

تم اپنی شرطوں پہ کھیل کھیلو میں جیسے چاہے لگاؤں بازی

اگر میں جیتا تو تم ہو میرے اگر میں ہارا تو میں تمہارا

تمہارا عاشق تمہارا مخلص تمہارا ساتھی تمہارا اپنا

رہا نہ ان میں سے کوئی دنیا میں جب تمہارا تو میں تمہارا

تمہارا ہونے کے فیصلے کو میں اپنی قسمت پہ چھوڑتا ہوں

اگر مقدر کا کوئی ٹوٹا کبھی ستارا تو میں تمہارا

یہ کس پہ تعویذ کر رہے ہو یہ کس کو پانے کے ہیں وظیفے

تمام چھوڑو بس ایک کر لو جو استخارہ تو میں تمہارا

جس طرح آپ نے بیمار سے رخصت لی ہے

خط کے چھوٹے سے تراشے میں نہیں آئیں گے

غم زیادہ ہیں لفافے میں نہیں آئیں گے

ہم نہ مجنوں ہیں نہ فرہاد کے کچھ لگتے ہیں

ہم کسی دشت تماشے میں نہیں آئیں گے

مختصر وقت میں یہ بات نہیں ہو سکتی

درد اتنے ہیں خلاصے میں نہیں آئیں گے

اس کی کچھ خیر خبر ہو تو بتاؤ یارو

ہم کسی اور دلاسے میں نہیں آئیں گے

جس طرح آپ نے بیمار سے رخصت لی ہے

صاف لگتا ہے جنازے میں نہیں آئیں گے

قیس جنگل میں اکیلا ہے

قیس   جنگل  میں   اکیلا   ہے مجھے جانے دو

خوب گزرے گی جو مل بیٹھیں گے دیوانے دو

ملاقات ہو گئی

نقشہ  اٹھا  کے کوئی  نیا  شہر  ڈھونڈیئے

اس شہر میں تو سب سے ملاقات ہو گئی

‏میں بچپن میں کھلونے توڑتا تھا

‏میں بچپن میں کھلونے توڑتا تھا

مرے   انجام  کی وہ   ابتدا  تھی

ہم اپنی جان کے دشمن کو

ہم اپنی جان کے دشمن کو اپنی جان کہتے ہیں

محبت کی اسی مٹی کو  ہندستان  کہتے   ہیں

کسی کا عہد جوانی میں پارسا ہونا

کسی کا عہد جوانی میں پارسا ہونا

قسم خدا کی یہ توہین ہے جوانی کی

‏محسوس ہو رہا ہے

‏محسوس ہو رہا ہے کہ میں خود سفر میں ہوں

جس دن سے   ریل  پر میں تجھے چھوڑنے گیا

میرے آنگن سے پرندے نہ اڑاؤ لوگو

‏ہم نے لہجوں کو سمجھنے کی ریاضت کی ہے 

ہم کو آداب نہ جینے کے سکھاؤ لوگو 

انکی آواز سے لگتا ہے کہ زندہ ہوں ابھی . ۔

میرے آنگن سے پرندے نہ اڑاؤ لوگو

‏سارا ہی شہر اس کے جنازے میں تھا شریک

‏سارا ہی شہر اس کے جنازے میں تھا شریک...

تنہائیوں کے خوف سے جو شخص مر گیا...

چلے آیا کرو میری طرف بھی! محبت کرنے والا آدمی ہوں

یہ مت پوچھو کہ کیسا آدمی ہوں

کرو گے یاد، ایسا آدمی ہوں

مرا نام و نسب کیا پوچھتے ہو!

ذلیل و خوار و رسوا آدمی ہوں

تعارف اور کیا اس کے سوا ہو

کہ میں بھی آپ جیسا آدمی ہوں

زمانے کے جھمیلوں سے مجھے کیا

مری جاں! میں تمہارا آدمی ہوں

چلے آیا کرو میری طرف بھی!

محبت کرنے والا آدمی ہوں

توجہ میں کمی بیشی نہ جانو

عزیزو! میں اکیلا آدمی ہوں

گزاروں ایک جیسا وقت کب تک

کوئی پتھر ہوں میں یا آدمی ہوں

شعورؔ آ جاؤ میرے ساتھ، لیکن!

میں اک بھٹکا ہوا سا آدمی ہوں

‏میں تو ہر حال میں خوش ہوں

‏میں تو ہر حال میں خوش ہوں مرے مالک لیکن

تیرے منکر مجھےدیکھیں گے تو کیا سوچیں گے

میں نے مزدوروں کے ماتھے

میں نے مزدوروں کے ماتھے پہ پسینہ دیکھا

جن کے پیسوں سے امیروں نے مدینہ دیکھا

بس ہو چکا حضور یہ پردے ہٹائیے

بس ہو چکا حضور یہ پردے ہٹائیے 

سب منتظر ہیں سامنے تشریف لائیے 

آواز میں تو آپ کی بے شک خلوص ہے 

لیکن ذرا نقاب تو رخ سے ہٹائیے 

*ہم مانتے ہیں آپ بڑے غم گسار ہیں* 

*لیکن یہ آستین میں کیا ہے دکھائیے*

 

اب قافلے کے لوگ بھی منزل شناس ہیں 

آخر کہاں کا قصد ہے کھل کر بتائیے

بادہ کشوں کی اصل جگہ میکدے میں ہے 

کس نے کہا کہ آپ بھی منبر پہ آئیے

‏مِٹتی ہوئی تہذیب سے نفرت نہ کیا کر

مِٹتی ہوئی تہذیب سے نفرت نہ کیا کر

چوپال پہ بُوڑھوں کی کہانی بھی سنا کر

معلوم ہُوا ہے یہ پرندوں کی زبانی

تھم جائے گا طوفان درختوں کو گرا کر

پیتل کے کٹورے بھی نہیں اپنے گھروں میں

خیرات میںں چاندیں کا تقاضا نہ کیا کر

ممکن ہے گریبانوں میں خنجر بھی چُھپے ہوں

تُو شہرِ اماں میں بھی نہ بے خوف پھرا کر

کیا خُوب لڑکپن تھا کہ ساون کے دنوں میں

تسکین ملا کرتی تھی بارش میں نہا کر

مانگے ہوئے سورج سے تو بہتر ہے اندھیرا

تُو میرے لیے اپنے خدا سے نہ دُعا کر

ترتیب ترے حُسن کی مٹ جائے گی اک دن

دیوانے کی باتوں کو نہ بے ربط کہا کر

تحریر کا یہ آخری رشتہ بھی گیا ٹوٹ

کتنا ہوں میں تنہا ترے مکتوب جلا کر

آتی ہیں بہت رات کو رونے کی صدائیں

ہمسائے کا احوال کبھی پوچھ لیا کر

وہ قحطِ ضیا ہے کہ مرے شہر کے کچھ لوگ

جگنو کو لئے پھرتے ہیں مٹھی میں دبا کر

رفیق سندیلوی